Saalmon La Foorneeyay & Insalaaddo Karooto
- English
- Baked Salmon & Carrot Salad
- Français
- Saumon Grillé & Salade de Carottes
- العربية
- سلمون بالفرن وسلطة الجزر
Waxaa qoray Leila iyo Cabdullaahi · ·
Cuntooyinka qaarkood si fudud ayaa loo helaa sida loo sameeyo. Soo’da Insalaaddada Karootada ayaa tusaale u ah. Waxaa soo’daas inoo soo dirtay saaxiib deggan waddanka Faransiiska oo la magac baxday J. Waana iyada qofta waxa aan qorno ku tarjunta af-Faransiiska. Aad ayay ugu mahadsan tahay.
Waxaase jira soo’yo badan oo si sahlan lagu haleeli karin. Waxaan filaynaa in badankeenna ay nasoo martay inaan cunnay cuntooyin aan aad u jeclaysannay laakiin naloo diiday soo’dooda. Dadka qaarkood si cad ayay kuugu sheegaayaan inay soo’da sir tahay, qaar kalena way ka meeraystaan su’aasha. Faa’iido ma lahan inaad ku adkeysatid in soo’da lagu siiyo. Haddii aad ku adkaysatid, soo’da muufada lagu siiyay waxaa ka sameysmaya cambaabur.
Hooyo Faadumo waxay inooga sheekeysay doolsho ay mar ka cuntay guriga saaxiibteeda. Berigaas waxay joogtay magaalada Baydhabo, saxiibteedana waxay ahayd Maraykan oo odaygeeda madax ka ahaa beerta cilmi baarista ee Bonka. Goor kasta ay saaxiibteeda booqato, waxaa la siin jiray doolshahaas aadka u macaanaa. Wey isku dayday inay soo’da ka hesho laakiin wey kasoo saari weysay.
Haweenayda Maraykanka ah waxaa u shaqeyn jiray kuug (cunta kariye) Soomaali ah oo cuntada u karin jiray. Hooyo wey isku dayday inay sirta ka hesho, laakiin si xoog leh ayaa loogu adkeeyay inuu sirtaas bixinin, hadduu gaabsan waayana inuu gowrac jiro maqal. Dhoor jeer ayuu arkay hooyo oo jikada soo galeysa ayadoo wax ku marmarsoonaysa, laakiin mar walba ayadoo gacma maran ayay ka bixi jirtay. Kuuggii sirta way ku culusaatay, wayna hurdo seejisay. Dhibka haystay wuxuu i xasuusiyay maanso uu curiyay abwaanka caanka ah ee Maxamed Xaashi Dhamac Gaariye (AUN). Maansada waa Madax Goodir, wuxuuna yiri:
Guyaal hore (sanado ka hor) Boqor geesalaa jirey (boqor geesa leh ayaa jiray) Oo goostay weligii (oo go’aansaday weligiisa) Inaan iinta lagu garan. (in ceebtaas uu lahaa aan la ogaan) Fule waa geddiisoo (fulay tabtiisa ayaa badan) Wuxuu goorba hubiyoo (wuxuu had iyo jeer geesaha taabto) Gedfo oo cimaamado, (uu qariyo, cimaamadna ku duubo)
Nin gaaraa sirtii helay (nin u adeegi jiray ayaa sirtiisa ogaaday)
Godob buuse taransaday (adeegihii dambi ayuu xambaarsaday)
Garashadu u sabab tahay (sirtaas uu ogaaday ayaa sabab u ahayd)
Qof gafaana laga dhigay, (boqorka wuxuu adeegaha u arkay inuu yahay qof qalad ka suuroobo) Hadduu gaabsan waayana (hadduu adeegaha afkiisa xiri waayana) Inuu gowrac jiro maqal.(waxaa loo sheegay in kaw laga siin doono)
Wax badan ayuu sirtaas uurka ku haayay ilaa uu is celin waayay. Wuxuu aaday duurka, markaasuu god intuu qoday ayuu ku faaruqiyay sirta calooshiisa ku jirtay. Gaariye wuxuu maansada kusoo gabagabeeyay sidaan:
Geeskii warkiisii (geeskii sheekadiisa) Kii cabudhay kolkii ganay (ninkii sirta isku ceshay markuu sii daayay) Garbihiisa laga duul (culeyska garbaha ka saarnaa ayaa ka haaday) Gebigii fudayd noqoy (isagoo dhan ayaa fudayd dareemay) Goobtiina aasyoo (godkii uu qoday ayuu duugay) Ka hurgufay go’iisii (dharkiisa ayuu ka jafay ciidda) Galbay oo ka sii socoy. (wuu dhaqaaqay oo meeshii ayuu ka socday) Ka gadaalna meeshii (kaddibna meeshii uu sirta ku aasay) Laye “goortii roob helay, (waxaa la yiri, “markuu roob ku da’ay,) Geesaa ka soo baxay.” (geeso ayaa dhulkii ka soo baxay)
Hooyo dadaalkeeda ugama darin. Maalin maalmaha ka mid ah, ayay haddana jikadii ku laabatay waxayna soo heshay sirtii. Kuugga sirtii god kuma soo xabaalin ee wuxuu ku riday salladda qashinka. Si farsamaysan ayuu ugu riday ayadoo salladda kasoo jeedda sida geesaha goodirka. Waxa la qarinaayay wuxuu ahaa doolshaha baakadda laga qaso! Si tartiib ah ayay u soo qaadatay oo garbasaarta hoosteeda gashatay. Howsha inteeda kale waxay u tiillay aabbe, inuu doolshahaas ka raadiyo Xamar.
Subarmaarketka markaan ku arko doolshaha baakadaha, waxaan soo xasuustaa hooyo sheekadeeda, waana dhoolla caddeeyaa.
(Maansada oo wada dhan waxaa ka heli kartaan poetrytranslation.org)
Daawo
Mukawinaadka
1 koob = 237 mL · 1 QW = 15 mL · 1 qy = 5 mL (QW waa qaaddo weyn; qy waa qaaddo yar).
Saalmon La Foorneeyay & Insalaaddo Karooto
Insalaaddo Karooto
Diyaarinta
Taabo tallaabo si aad u calaamadiso inay dhammaatay.
Kalluun (Mallaay) Saalmon Diyaarinta saalmonka la foorneeyay Saalmonka u jar qiyaasta aad u qaddimaysid.
Isku dar tuunta, filfisha madoow, cusbada, saliidda oliifada, mastardka iyo burka.
Si fiican isku qas.
Saxanka aad ku dubaysid xaanshi alamuunyam saar. Saalmonka ku saf.
Carcarafta aad qastay nuskeeda mari.
Dhinaca kale u geddi. Nuska kale mari. Adigoon daboolin, ku dub foorno lasii kululeeyay 500°F/260°C muddo 12 daqiiqo.
Saalmon La Foorneeyay Saalmon La Foorneeyay & Insalaaddo Karooto Diyaarinta insalaaddada karootada Karootada makiinad ku xoq.
Haddaad doontid mabsharo isticmaal.
Waxyaabaha sooska isku dar oo dhalo ku shub (liin dhanaan la miiray, oranjo la miiray, saliidda oliifada, cusbo, filfil madoow, malab, qalka tufaaxa iyo mastard). Dhalada si fiican u rux.
Karootada la jarjary, sabiibka iyo baqduuniska baaquli ku rid.
Sooska ku kor shub.
Si fiican u walaaq. Horey ayaa ka qaddimi kartaa, laakiin insalaaddada waxay ku sii fiican tahay in qaboojiyaha la geliyo muddo laba saacadood ama inaad sameysid maalin ka hor.
Faallooyin
39 faalloMahadsanid! Faalladaadu waxay soo bixi doontaa marka aan hubinno.
Wax baa khaldamay. Fadlan isku day mar kale.
Hi I’m trying to do ure baked salmon and carrot salad. What kind of honey mustard did u use. I live in London uk I could only find honey mustard dressing and honey mustard marinade. Plz help
ASC aad ayan uga helay salmonka iyo waliba ansalatada karootka waxan idin leeyahay Fjzkumulahu kheyran howl culus ayaad noo heysaan abaalkiina jano Allaha ka dhigo aameen
Aamiin walaal. Aad iyo aad ayaa u mahadsan tahay.
Asc wr wr walaal illaahey ajarbadan ha idinka siiyo aad ayaan ugu helay website kiimacaankiyaa xawaash walaal suaal ayaan idinweydiina tan hore hadaan hesanin honey mastar m axaan kubadala haduu fish ka freezen yahay sacada ma ukordhiya
Wacalaykum Assalaam Waraxmatullaahi Wabarakaatuh.
Aad iyo aad ayaa ugu mahadsan tahay faallada iyo ducada. Waxaad ku beddeli kartaa 2 qy malab iyo 1/4 qy oo huruud.
I would like to say Congrats to the couple who made this websit. I have been cooking since i was 8 years old, when I found out about the websit I was really happy and also to see a Somalia people who could benefit others.I also learned a lot from here and still learning new stuff. Thank you very much for this.
You are most welcome, Shukri. Thank you very much for your kind words. We are happy we could help.
walalayaal wxa jiro dad bahi uqaba cunta kariska lkn an fahmeen luqada engilishka wxy codsanayan in laga dhigo luqadda somali si ay ufahman cunta kariska mahadsanidiin walaalayaal
Afar luqadood ayaan ku micneynaa. Luqad walba bog u gaar ah ayaan u samaynay. Waxaad gujisaan masawirka koowaad hoostiisa meesha af Soomaali ku qoran.